ظرف آسماں کا ہے

میں خود زمیں ہوں مگر ظرف آسماں کا ہے
کہ ٹُوٹ کر بھی میرا حوصلہ چٹان کا ہے

بُرا نہ مان میرے حرف زہر زہر سے ہیں
میں کیا کروں کہ یہی ذائقہ زباں کا ہے

ہر ایک گھر میں مُسلط ہے دِل کی ویرانی
تمام شہر پہ سایہ میرے مکان کا ہے

بِچھڑتے وقت سے اب تک میں یُوں نہیں رویا
وہ کہہ گیا تھا کہ یہ وقت امتحان کا ہے

مُسافروں کی خبر ہے نہ دُکھ ہے کشتی کا
ہوا کو جتنا بھی غم ہے وہ بادباں کا ہے

وہ برگِ زرد کی صُورت ہوا میں اُڑتا ہے
وہ ایک ورق بھی میری اپنی داستاں کا ہے

یہ اور بات کہ عدالت ہے بے خبر ورنہ
تمام شہر میں چرچا میرے بیاں کا ہے

اثر دکھا نہ سکا اس کے دِل میں اشک میرا
یہ تیر بھی کسی ٹُوٹی ہوئی کمان کا ہے

بچھڑ بھی جائے مگر مجھ سے بے خبر بھی رہے
یہ حوصلہ ہی کہاں میرے بدگماں کا ہے

قفس تو خیر مقدّر میں تھا، مگر محسن
ہوا میں شور اب تک مری اُڑان کا ہے