ہم کہاں اور تم کہاں ، جاناں‌

ہم کہاں اور تم کہاں ، جاناں‌
ہیں کئی ہجر درمیاں ، جاناں

رائیگاں وصل میں بھی وقت ہوا
پر ہوا خوب رائیگاں ، جاناں

میرے اندر ہی تو کہیں گم ہے
کس سے پوچھوں تیرا نشاں ، جاناں

عالم بیکران رنگ ہے تو
تجھ میں ٹھہروں کہاں کہاں ، جاناں

روشنی بھر گئی نگاہوں میں
ہو گئے خواب بے اماں ، جاناں

اب بھی جھیلوں میں عکس پڑتے ہیں
اب بھی نیلا ہے آسماں ، جاناں

ہے جو پرخوں تمہارا عکس خیال
زخم آئے کہاں کہاں ، جاناں